(ភ្នំពេញ)៖ កម្លាំងគណៈបញ្ជាការឯកភាពរាជធានីភ្នំពេញ បានបើកការបង្ក្រាបបទល្មើសល្បែងស៊ីសង សរុប៨៧ករណី ឃាត់ខ្លួនមនុស្សចំនួន១៥២នាក់ នៅតាមខណ្ឌក្នុងមូលដ្ឋានរាជធានីភ្នំពេញ ក្នុងរយៈពេល១២ថ្ងៃ ចាប់ពីថ្ងៃ១៧-២៨ ខែកញ្ញា ឆ្នាំ២០២២។
លោកវរសេនីយ៍ឯក សាន សុខសីហា បានបញ្ជាក់ថា ប្រតិបត្តិការនេះ ធ្វើឡើងដោយអនុវត្តតាមបទបញ្ជារបស់លោក ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ និងលោកឧត្តមសេនីយ៍ឯក ស ថេត អគ្គស្នងរង និងជាស្នងការនគរបាលរាជធានីភ្នំពេញ បានដាក់ចេញនូវផែនការ និងបានបង្កើតក្រុមការងារ ដេីម្បីធ្វើការបង្ក្រាប ការបើកលេងល្បែនស៊ីសងខុសច្បាប់។
លោកបានអះអាងថា ក្នុងករណីដែលបង្ក្រាបបានកន្លងមកនេះ រួមមាន ឆ្នោតវៀតណាម, ម៉ាស៉ីនហ្គេមអនឡាញ, កន្លែងលេងបៀ, ល្បែងភ្នាល់អនឡាញ, ឆ្នោតឡូតូ និងទីតាំងបញ្ចាំ។
ដោយឡែក សម្រាប់ទីតាំងទទួលបញ្ចាំដោយខុសច្បាប់ដែលត្រូវបានកម្លាំងសមត្ថកិច្ចបង្ក្រាបនោះ លោកវរសេនីយ៍ឯក សាន សុខសីហា បានឲ្យដឹងថា មានចំនួន១៣ទីតាំង នៅខណ្ឌទួលគោក ឃាត់ខ្លួនមនុស្សចំនួន៩នាក់។
លោក ឃ្លាំង ហួត អភិបាលរងរាជធានីភ្នំពេញ បានក្រើនជាថ្មីថា បញ្ហាកុងសុីបញ្ចាំខុសច្បាប់ជាប្រភពនាំឱ្យមានបទល្មើស និងប៉ះពាល់ដល់ជីវភាពប្រជាជនមានចំណូលទាប ។ បេសកកម្មបង្រ្កាបល្បែងសុីសងខុសច្បាប់ កុងសុីបញ្ចាំខុសច្បាប់ ជាភារកិច្ចអាជ្ញាធរមានសមត្ថកិច្ច និងអ្នកពាក់ព័ន្ធត្រូវអនុវត្តដោយការទទួលខុសត្រូវខ្ពស់ ។ ការមិនចូលរួមមិនអើពើរបស់មន្ត្រី កងកម្លាំងមានសមត្ថកិច្ចដែលពាក់ព័ន្ធ..គឺ.. ស្មើនឹងមើលងាយបទបញ្ជាថ្នាក់ដឹកនាំ មើលងាយប្រជាជនស្លូតត្រង់ ។ ទីតាំងឃ្លាំងរំសេវ និងទីតាំងដទៃទៀតត្រូវតែបំបាត់ការទទួលបញ្ចាំរបស់ចោរ របស់គ្មានឯកសារគ្រប់គ្រាន់ ។
សូមរំលឹកទៀតថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញបញ្ជាយ៉ាងដាច់ណាត់ឲ្យមន្ត្រីពាក់ព័ន្ធគ្រប់រូប ជាពិសេសមន្ត្រីថ្នាក់ក្រោមជាតិត្រូវបង្ក្រាបឲ្យអស់នូវល្បែងស៉ីសងខុសច្បាប់គ្រប់ប្រភេទ។ ប្រសិនបើអភិបាលរាជធានី/ខេត្ត អភិបាលក្រុង/ស្រុក/ខណ្ឌរូបណាមិនទទួលខុសត្រូវលើតួនាទី បណ្តោយឲ្យល្បែងស៉ីសងរីកសាយភាយក្នុងមូលដ្ឋានរបស់ខ្លួន សម្ដេចតេជោមិនស្ទាក់ស្ទើរក្នុងការដកចេញពីមុខតំណែងនោះឡើយ៕
Discussion about this post