ថៃឆ្លើយតបតាត្រាំថាខ្លួនមិនធ្វើតាមកិច្ចព្រមព្រៀងសន្តិភាពឡើយ លុះត្រាតែកម្ពុជា ព្រមសុំទោសទទួលស្គាល់កំហុសរឿងដាក់មីន

យោងតាមការបង្ហោះនៅលើគណនីហ្វេសប៊ុករបស់លោក អានុទីន ឆានវីរៈគុល នាថ្ងៃសៅរ៍នេះ ថៃបានបញ្ជាក់ជាថ្មីថា ខ្លួននឹងនៅតែផ្អាករាល់សកម្មភាពទាំងអស់ក្រោមសេចក្តីថ្លែងការណ៍ក្រុងកូឡាឡាំពួរ ទាល់តែកម្ពុជាទទួលខុសត្រូវចំពោះការបំពានកិច្ចព្រមព្រៀង និងសុំទោសចំពោះឧបទ្ទវហេតុគ្រាប់មីនដែលបានធ្វើឲ្យទាហានថៃម្នាក់រងរបួស។

នាយករដ្ឋមន្ត្រីថៃ អានុទីន រៀបរាប់ថា លោកផ្តល់សារនេះក្នុងអំឡុងពេលហៅទូរសព្ទកាលពីយប់ថ្ងៃសុក្រជាមួយប្រធានាធិបតីអាមេរិក លោក ដូណាល់ ត្រាំ និងនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ដែលមេដឹកនាំទាំងពីរបានជំរុញទីក្រុងបាងកកឲ្យបន្តរក្សាការប្តេជ្ញាចិត្តរបស់ខ្លួនចំពោះកិច្ចខិតខំប្រឹងប្រែងសន្តិភាព ដែលបានគូសបញ្ជាក់នៅក្នុងសេចក្តីថ្លែងការណ៍ដែលបានចុះហត្ថលេខាកាលពីថ្ងៃទី២៦ខែតុលា។

លោកអានុទីន បញ្ជាក់ថា ថៃនឹងមិនបន្តកិច្ចសហប្រតិបត្តិការក្រោមសេចក្តីថ្លែងការណ៍នោះទេ រហូតទាល់តែកម្ពុជាទទួលស្គាល់ការបំពាន និងចេញមុខសុំទោសជាសាធារណៈចំពោះប្រជាជនថៃចំពោះហេតុការណ៍ជាន់មីនរបស់ទាហានថៃកាលពីពេលថ្មីៗនេះ។

លោកក៏សង្កត់ធ្ងន់ថា ប្រទេសថៃរក្សាសិទ្ធិក្នុងការចាត់វិធានការណាមួយដែលចាំបាច់ ដើម្បីការពារអធិបតេយ្យភាព និងសុវត្ថិភាពរបស់ប្រជាពលរដ្ឋខ្លួន៕

ប្រភព៖ ហ្វេសប៊ុកអានុទីន