គ្រាន់តែរឿងបាត់មីកញ្ចប់! ទាញពូថៅកាប់ទៅលើគ្នាឯង មិនប្រណី

បាត់ដំបង៖ គ្រាន់តែរឿងបាត់ មីកញ្ចប់ដែលជារបស់ហូបសោះក៏កើតជារឿងទំនាស់ហិង្សា បណ្តាលឲ្យបុរសម្នាក់ ទាញពូថៅ កាប់ទៅលើបុរសម្នាក់ទៀត ផ្ទួនៗ ទាំងកំរោល បណ្ដាលឱ្យបុរសរងគ្រោះ រងរបួសធ្ងន់ ដង្ហើមចង្រិត។

លោកវរសេនីយ៍ទោ សេង លុច អធិការនគរបាល ស្រុកថ្មគោល បានប្រាប់ឲ្យដឹងថាៈ ករណីហិង្សាដោយចេតនា មានស្ថានទម្ងន់ទោស ប្រើប្រាស់ពូថៅ ទាំងកំហឹង ដោយខុស ច្បាប់នេះ បានកើតឡើង នៅវេលាម៉ោង ១២:៣០ នាទីថ្ងៃត្រង់ ថ្ងៃទី២៨ ខែវិច្ឆិកា ឆ្នាំ ២០២១ នៅត្រង់ចំណុច វត្តនិគ្រោធរង្សី ក្នុងភូមិរូងជ្រៃ ឃុំរូងជ្រៃ ស្រុកថ្មគោល ខេត្តបាត់ដំបង។
ជនសង្ស័យបង្កហិង្សាដោយចេតនានេះ មានឈ្មោះ ម៉ា ណារិន ហៅ សម្បត្តិ ភេទប្រុស អាយុ ៥៥ ឆ្នាំ ។ ចំណែកឯជនរងគ្រោះវិញ ឈ្មោះ យ៉ម ព្រីង ភេទប្រុស អាយុ ៤៨ឆ្នាំ មានលំនៅ នៅភូមិបល្ល័ង្គក្រោម ឃុំរូងជ្រៃ ស្រុកថ្មគោល បុរសទាំងពីរនាក់នេះ ជាអ្នកបូជាសព នៅក្នុងវត្តខាងលើ។

នៅថ្ងៃកើតហេតុ ខណៈពេលជនរងគ្រោះ បានដើរចូលមកដល់ទីតាំង ឈាបនដ្ឋាន ស្រាប់តែជនសង្ស័យ បានសួរនាំរឿងគាត់ បានបាត់ មី ជាញឹកញាប់។ ភ្លាមនោះ ជនរងគ្រោះ បានបដិសេធ រហូតដល់ទាស់សម្តីគ្នា មួយប្រាវ ។ ចុងក្រោយ ជនបង្ក បានស្ទុះទៅទាញ ពូថៅ រួចកាប់ពេញផ្ទួនៗ ពេញទំហឹងតែម្តង លើក្បាល និងចង្កេះជនរងគ្រោះ បណ្តាលឲ្យ របួសធ្ងន់ធ្ងរ ហើយជនរងគ្រោះ បានត្រូវបញ្ជូនទៅសង្គ្រោះបន្ទាន់ នៅមន្ទីរពេទ្យ។

ក្រោយកើតហេតុ កម្លាំងមូលដ្ឋាន ក៏ដូចជា កម្លាំងផ្នែកជំនាញអធិការដ្ឋាននគរបាល ស្រុកថ្មគោល បានចុះដល់ទីតាំងកើតហេតុ ហើយបានឃាត់ខ្លួន ជនបង្កបានភ្លាមៗ ព្រមទាំងដកហូតបានវត្ថុតាង ពូថៅដងឈើ ១ផងដែរ រួចនាំមកកាន់អធិការដ្ឋាននគរបាល ស្រុក ដើម្បីសាកសួរ និង រៀបចំសំណុំរឿង ចាត់ការតាមនីតិវិធី៕

របាយការណ៍ សមត្ថកិច្ច