ជំនួយមនុស្សធម៌ចលនាអូឡាំពិកពី IOC និង OCA តាមរយៈក្រសួងអប់រំនឹងយកទៅជួយកុមារភៀសសឹកលើកទឺកចិត្តកុំបន្តសោកសៅ

ថ្ងៃទី៣០ ខែធ្នូ ឆ្នាំ២០២៥ គណៈកម្មការអូឡាំពិកម្ពុជាបាននាំយកអំណោយជាច្រើនមុខ ដែលជាអំណោយរបស់ IOC និង OCA ក្នុងសកម្មភាពជំនួយមនុស្សធម៌ចលនាអូឡាំពិក ផ្តល់ជូនទៅកាន់ក្រសួងអប់រំយុវជននិងកីឡា តាមរយៈតំណាងឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ក្រោមវត្តមានឯកឧត្តមរដ្ឋមន្ត្រី ហ្សង ជួនណារ៉ុន។

ឯកឧត្តម វ៉ាត់ ចំរើន បានថ្លែងប្រាប់ឱ្យដឹងថា ជំនួយមនុស្សធម៌ចលនាអូឡាំពិកពី IOC និង OCA លើកនេះ បានផ្តល់ជូនក្រសួងអប់រំយុវជននិងកីឡាកម្ពុជាដើម្បីក្រសួងផ្ទាល់ចុះផ្ទាល់ធ្វើការចែកជូនតាមមណ្ឌលកុមារភៀសសឹក ឱ្យទទួលបានមានទាំងសម្ភារៈសិក្សាចំបាច់និងឧបករណ៍លេងកីឡាជាច្រើនប្រភេទ ដែលកុមារទាំងអស់នោះ កំពុងខ្វះខាត និង មានការលំបាកទទួលការរៀនសូត្រ។ សម្រាប់ជំនួយនេះ មានឧបករណ៍កីឡា៣ប្រភេទ ដែលជាប្រភេទឧបករណ៍លេងកីឡាលេងស្រួលក្នុងជុំរំ ដើម្បីជួយស្រួលផ្លូវអាម្មរណ៍ក្មេងៗទាំងអស់នោះ កុំមានភាពតានតឹង ស្មុគស្មាញ, ភាពភ័យព្រួយ ឬ ភាពឈឺចាប់បាត់បង់ផ្ទះសម្បែង និង ជាពិសេសលើកទឹកចិត្តនិងបង្កើនស្មារតី កុមារាកុមារី ក្មេងតូចៗ ឱ្យមានអារម្មណ៍ល្អប្រសើរឡើងវិញ។

ឯកឧត្តម វ៉ាត់ ចំរើន ក៏បានអំពាវនាវសូមសប្បុរសជននិងពលរដ្ឋទាំងអស់មេត្តាបន្តសកម្មភាព ប្រមូលថវិកាឬមូលនិធិជួយដល់ភៀសសឹកនិងជាពិសេសកុមារបន្តទៀត ព្រោះជនភៀសសឹកគឺមានចំនួនច្រើន សូមកុំលែងដៃពួកគាត់អោយសោះ ព្រោះយើងមិនទាន់ចប់បានសន្តិភាព១០០ភាគរយៈនោះទេ។

សម្រាប់ជំនួយមនុស្សធម៌ចលនាអូឡាំពិកពី IOC និង OCA ផ្តល់ជូនខាងក្រសួងអប់រំយុវជននិងកីឡា តាមរយៈ IOC-OCA មានសម្ភារកុមារចំនួន៥០០ឈុត ដោយមានមួយឈុត សៀវភៅសរសេរ,ខ្មៅដៃ,សៀវភៅផាត់ពណ៌, នំស្ករគ្រាប់, កាបូបក្រណាត់តុក្កតា,ដបទឹក, ជ័រលុប, កាំបិតចិតខ្មៅដៃ, ខ្មៅដៃពណ៌។ ចំណែកសម្ភារកីឡា៣ប្រភេទមាន, បាល់ទះ, បាល់ទាត់, និងវាយសី បូករួមពាវយឺតនិងក្រម៉ាជាង១០០០ឈុត ហើយក៏មានថវិកាផ្ទាល់ចំនួន៨លានរៀលបន្ថែមពីលើទៀត៕