លើកមម្រាបមួយចង្អុលមេឃ ដើរចូលតុលាការដោយមិនភ័យឡើយ! ព្រោះមានភាពក្លាហានតាំងពីគេមិនទាន់ប្តឹងម្ល៉េះ (ចុចបន្តព័ត៌មានលម្អិត)

ភ្នំពេញ ៖ លួងលោមជនរងគ្រោះក្នុងរង្វង់ទឹកប្រាក់ជាង៦ម៉ឺនដុល្លារ ដោយយកទៅរត់ការ ធានាយកកូនជនរងគ្រោះអាចចេញទៅរស់នៅប្រទេសអូស្ត្រាលី ព្រោះខ្លួន ជាខ្មែរញ៉ូវហ្សេឡែន ដោយអះអាង ប្រាប់ ជនរងគ្រោះថា ដឹងពីការងារនេះច្បាស់អាចរត់ការបាន ។

ប៉ុន្តែចុងក្រោយជនរងគ្រោះល្មមភ្ញាក់ផ្អើល ថាស្រ្តីឆ្លាតរូបនេះ បោកប្រាស់រត់ការមិនបានសម្រេច គឺលុយអស់ជាង៦ម៉ឺនដុល្លារទៅហើយ ចំណែកលុយក៏ទារមិនបានទៀត ស៊ីដាច់លុយរករត់យករួចខ្លួន។ សាមីខ្លួនរងគ្រោះ សម្រេចចិត្តប្តឹង ស្ត្រីអាណិកជនខ្មែរម្នាក់រស់នៅប្រទេសញ៉ូវហ្សេឡែន។

បើតាមសេចក្តីរាយការណ៍បានឱ្យដឹងថា ស្ត្រីអាណិកជនខ្មែរម្នាក់រស់នៅប្រទេសញ៉ូវហ្សេឡែន កាលពីថ្ងៃទី១១ ខែមិថុនា ឆ្នាំ២០២៣នេះ ត្រូវបានកម្លាំងសមត្ថកិច្ចកងរាជអាវុធហត្ថរាជធានីភ្នំពេញ នាំខ្លួនឡើងតុលាការ ពាក់ព័ន្ធការចោទប្រកាន់ពីបទ.ឆបោ.ក និងប្រើប្រាស់ឯកសារក្លែង។

សេចក្តីរាយការណ៍បន្តថា ស្ត្រីខាងលើរូបនេះមានឈ្មោះ ហេង ស៊ូសាន អាយុ២៦ឆ្នាំ មុខរបរជាបុគ្គលិកក្រុមហ៊ុន RHF STORE លក់ថ្មម៉ាប មានស្រុកកំណើតនៅខេត្តកំពង់ចាម និងមានទីលំនៅសព្វថ្ងៃរស់នៅប្រទេសញ៉ូវហ្សេឡែន។ ហើយជនសង្ស័យរូបនេះរងនូវការចោទប្រកាន់ថា បានទទួលយកប្រាក់ចំនួន ៦៤ ៤៦៤ ដុល្លារអាមេរិក ដើម្បីរត់ការនាំកូនដើមបណ្តឹងចេញទៅរៀននៅប្រទេសអូស្ត្រាលី តែមិនបានសម្រេច ហើយក៏ស៊ីដាច់ប្រាក់នោះតែម្តង។

សំណុំរឿងខាងលើនេះ បានស្ថិតនៅលោក សំម ឬទ្ធីវាសនា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បើកការស៊ើបសួរ ដែលការសាកសួរនោះត្រូវបានបញ្ចប់នៅរសៀលថ្ងៃទី១២ ខែមិថុនា ឆ្នាំ២០២៣នេះហើយ ប៉ុន្តែដោយផុតម៉ោងការងាររដ្ឋបាល តំណាងអយ្យការបានផ្ញើជនសង្ស័យទៅសមត្ថកិច្ចវិញ រួចតម្រូវឲ្យនាំខ្លួនទៅបន្តនីតិវិធីនៅព្រឹកថ្ងៃទី១៤ ខែមិថុនា បន្តទៀត៕